Кондак 1. О, треблаженный Кресте, и Всечестный! Тебе покланяемся вернии, и величаем. Радующеся о Божественном Возвышении твоем, но яко поюедительное, и оружие непобедимое, огради и покрый твоею благодатию зовущия ти: Радуйся, древо Треблаженное. Икос 1. Ангели от небес, невидимо окружают Крест живоносный со страхом, и светоподательную благодать светло подающий ныне верным зряще, ужасаются и стоят зовуще к нему таковая: Радуйся, Кресте, вселенныя хранителю: Радуйся, славо Церкве. Радуйся, источаяй независтно исцеления: Радуйся, просвещаяй мирския концы. Радуйся, животочное древо, и чудес сокровище: Радуйся, требогатое сложение и благодатей подателю. Радуйся, яко подножие еси Божие: Радуйся, яко предлежиши в поклонение всем. Радуйся, чаше исполнь сладости: Радуйся, свещниче вышния светлости. Радуйся, имже благословится тварь: Радуйся, имже покланяемся Творцу. Радуйся, Древо Треблаженное. Кондак 2. Видящи Елена себе посылаему, глаголет царю великодушно: все желательство души твоея, благоприятнее тщательству моему является, ищущи убо отвеща он: державнейшия тебе победы, якоже глаголеши, зови: Аллилуиа. Икос 2. Разум прежде недоразумеваемый, царица познавши, возопи к служащим: потщитеся вскоре от недр земных обрести, и дати мне крест, нань же взирая рече со страхом, обаче зовущи сице: Радуйся, радости истинныя изображение: Радуйся, первыя клятвы разрешение. Радуйся, сокровище в землю завистию сокровенное: Радуйся, знамение на небеси явльшееся. Радуйся, четверолучныйи огнезрачный Кресте: Радуйся, лествице высокоутвержденная предзренная иногда. Радуйся, Ангелов радостворное чудо: Радуйся, бесов многоплачевный струпе. Радуйся, сладкое Слова приятелище: Радуйся, огня прелести гасилище. Радуйся, Кресте блудящим предстателю: Радуйся, благопутешествующим вожде: Радуйся, Древо Треблаженное. Кондак 3. Сила древа явися тогда к уверению истинному всех, когда безгласну же и мертву к животу возстави, ужасно видение хотящим получити спасение, внегда пети сице: Аллилуиа. Икос 3. Имущи Елена, непреодоленное оружие, тече к сыну своему, той же зело увеселен, абие познав величайший Крест, веселяшеся, и игранми якоже песнми возопи к нему таковая: Радуйся, Кресте, света приятелище: Радуйся, Кресте, жизни сокровище. Радуйся, подателю даров Духа: Радуйся, пристанище по морю плавающих небурное. Радуйся, трапезо носящая якоже жертву Христа: Радуйся, розго грозд согреявшая носящ вино таинственное. Радуйся, яко скипетры царския храниши: Радуйся, яко главы змиев сокрушаеши. Радуйся, светлое веры познание: Радуйся, всего мира спасение. Радуйся, Божие к смертным благоволение: Радуйся, смертных к Богу посредствие. Радуйся, Древо Треблаженное. Кондак 4. Ревность внутрь божественную Елена приемши, взыска и обрете тощно в земли крыемый Крест, и являемый на небеси цареви: егоже воздвиже, и смотря на люди, верою рече: Аллилуиа. Икос 4. Солнцезрачный явися Крест в мире, и вси света исполншеся, и текше якоже к заре, зрят его яко благих виновна, в руках божественных воздвижена, егоже поюще реша: Радуйся, луче мысленнаго солнца: Радуйся, источниче неистощимаго мира. Радуйся, Адама и Евы воззвание: Радуйся, князей адских умерщвление. Радуйся, яко возносимый, нас ныне совозносиши. Радуйся, яко покланяемый, освящаеши души. Радуйся, Апостолов мировещанная славо: Радуйся, страстоносцев благоприятная сило. Радуйся, Кресте. Евреев обличение: Радуйся, верных человеков похвало. Радуйся, имже низложися ад: Радуйся, имже возсия благодать. Радуйся, Древо Треблаженное. Кондак 5. Божественное и победоносное древо видяще, под кров его вси ныне приступим, и яко оружие то держаще, победим врагов ополчения, и прикасающеся некасаемому Христу, усты тому воззовем: Аллилуиа. Икос 5. Виде Константин Великий с небесе свет, указующий ему знамение Креста звездами, и тем побеждати множество врагов, древо явити, и звати потщася к нему таковая: Радуйся, совета неизреченнаго сый конец: Радуйся, людей благочествующих сый рог. Радуйся, врагов отвращаяй полки: Радуйся, яко пламень попаляяй бесы. Радуйся, скипетро воинства царскаго: Радуйся, непобедимая победо воинства христолюбиваго. Радуйся, варварскую гордость низвергаяй: Радуйся, человеческия души соблюдаяй. Радуйся, многих зол прогонителю: Радуйся, многих благ пособителю. Радуйся, о нем же христоноснии людие играют: Радуйся, его же ради иудеи рыдают. Радуйся, Древо Треблаженное. Кондак 6. Лествица небесе касающаяся, бысть Крест Господень, всех от земли возводяй к высоте небесной, во еже спребывати ликом Ангельским всегда, оставльших яже ныне сущая, якоже несущая, и ведущих пети: Аллилуиа. Икос 6. Возсияв свет всюду Спасе, просветил еси долу во аде спящия: вратницы же адовы не терпяще зрети блистания твоего, падоша аки мертви. Сих же избавльшиися, ныне Крест зряще, зовут: Радуйся, востание усопших: Радуйся, утешение скорбных. Радуйся, адовых сокровищ испражнение (оскуднение). Радуйся, райских сладостей наслаждение. Радуйся, жезле потопивший египетское воинство: Радуйся, паки погрузивший еврейския люди. Радуйся, одушевленное древо разбойнику спасение: Радуйся, благовонная рожо, благочестивых благоухание. Радуйся, пище алчущих духом: Радуйся, печате, юже прияша человецы. Радуйся, Кресте, таин двере: Радуйся, от негоже проливаются божественнии потоцы. Радуйся, Древо Треблаженное. Кондак 7. Хотящу Моисею многоутружденный народ свободити от работы, вдался еси ему аки жезл: но познался еси ему и Божие быти таинство, темже удивися твоей, Кресте, силе, зовый: Аллилуиа. Икос 7. Закон, иже давый иногда на синайстей горе боговидцу. На Кресте волею пригвождается, за беззаконныя люди, и клятву древнюю разрушил есть, да видяще креста силу, вси ныне зовем: Радуйся, падших исправление: Радуйся, мирослужителей низпадение. Радуйся, воскресения Христова обновление: Радуйся, монашествующих божественное услаждение. Радуйся, древо благосеннолиственное, имже покрываются вернии: Радуйся, древо пророки предвозвещенное, насажденное на земли. Радуйся, царствия на враги поборствие: Радуйся, гражданства державное предстательство. Радуйся, судии праведнаго явление: Радуйся, падших человеков осуждение. Радуйся, сирых защитниче: Радуйся, нищих обогатителю. Радуйся, Древо Треблаженное. Кондак 8. Странное чудо видяще, странное житие поживем. Ум к небеси возносяще, того бо ради Христос на Кресте пригвоздися, и плотию пострада, хотя привлещи к себе зовущия: Аллилуиа. Икос 8. Весь прииде с высоты нося Божество едино превечное Слово, рождся же от Девы Матере, и явлься миру смиренный человек, Крест восприем оживи вопиющия таковая: Радуйся, мирное оружие: Радуйся, путешествующих начало. Радуйся, спасаемых премудросте и утверждение: Радуйся, вредящих обуяние и сокрушение. Радуйся, благоплодная безсмертная, и живоносная леторасле: Радуйся, цвете, процветший нам спасение. Радуйся, яко земная с горними совокупляеши: Радуйся, яко сердца дольних просвещаеши. Радуйся, имже тля отгнася: Радуйся, имже болезгь потребися. Радуйся, благих тмочисленное сокровище: Радуйся, верных многоименитая славо. Радуйся, Древо Треблаженное. Кондак 9. Паде демонов многомерзкий полк, и род еврейский посрамлен бысть, зря Крест от всех желательно покланяемый, присно же источающий цельбы вопиющим: А ллилуиа. Икос 9. Токи злославных мудрований престаша, пригвождшуся тебе Христе на Кресте: недоумеют бо воистинну, яко и Крест подъял еси, и тления избегл еси, мы же востание твое славяще взываем: Радуйся, премудрости Божия высото: Радуйся, промысла его глубино. Радуйся, яко тобою буесловцев безсловесных неразумне является: Радуйся, яко тобою гадателей неразумных пагуба сбывается. Радуйся, яко воскресение Христово являеши: Радуйся, яко страсти его нам возобновляеши. Радуйся, первозданных преступление разрешивый: Радуйся, входы райския отверзый. Радуйся, Кресте, верным честный: Радуйся, неверных языков сопротивоборче. Радуйся, Кресте, недугующих врачу: Радуйся, присный помощниче зовущим. Радуйся, Древо Треблаженное. Кондак 10. Спасти хотя мир, иже мира украситель прииде в онь неизреченно, и Крест подъят, Бог сый, нас же ради вся по нам подъемлет, темже и избавивый нас слышит от всех: Аллилуиа. Икос 10. Стену тебе вселенныя о Кресте жизноносный, необоримую и божественную разумеем: ибо небесе и земли творец устрои тя, распростирает на тебе руце. Странное слышание: и вся научи вопити: Радуйся, столпе благочестия: Радуйся, вечности наследие. Радуйся, мысленнаго Амалика побеждаяй: Радуйся, Иаковлими рукама прообразуемый, Радуйся, ты бо ветхозаветную сень преобразил еси: Радуйся, ты бо пророковещанныя глаголы исполнил еси. Радуйся, Спаса всех носивый: Радуйся, тлителя душ упразднивый. Радуйся, егоже ради соединихомся Ангелом: Радуйся, егоже ради озарихомся светом. Радуйся, тебе бо покланяемся почитающе: Радуйся, тебе бо возглашаем, зовуще: Радуйся, Древо Треблаженное. Кондак 11. Пение всякое изнемогает спостретися хотящее множеству многих твоих чудес: похвал бо множество аще и принесем тебе Кресте честный, ничтоже совершаем достойно, яже воздал еси нам, обаче зовем: Аллилуиа. Икос 11. Светоподательную зарю, во тме сущим подаст жизноподательный Крест: невещественный бо прият свет, и к разуму божественному наставляет всех, возвышает же ныне возвышаемый ум наш, во еже пети сицевая: Светоподательную зарю, во тме сущим подаст жизноподательный Крест: невещественный бо прият свет, и к разуму божественному наставляет всех, возвышает же ныне возвышаемый ум наш, во еже пети сицевая: Радуйся, светило сущия во тме просвещающее: Радуйся, звездо мир озаряющая. Радуйся, звездо христоубийцев помрачающая: Радуйся, громе неверныя устрашающий. Радуйся, яко просветил еси православных соборы: Радуйся, яко ниспровергл еси идольския жертвища. Радуйся, егоже образ с небеси явися: Радуйся, егоже благодать лукавствия прогоняет. Радуйся, иже плоти знаменаеши умерщвление: Радуйся, иже страстей утоляеши востание. Радуйся, на немже Христос распяся: Радуйся, имже весь мир спасеся. Радуйся, Древо Треблаженное. Кондак 12. Благодать дати восхотев Христос человеком, руце на Кресте распростирает, созывает же языки вся, и дарует царство всем небесное, поющим песнь достойно, и верно зовущим: Аллилуиа. Икос 12. Поюще твою песнь хвалим тя усердно яко одушевленное древо господне: на тебе бо пригвождся плотию, владычествуяй горними силами, освяти, прослави, и научи пети тебе таковая: Радуйся, Кресте, мысленный мечу: Радуйся, святых святое зрение. Радуйся, пророков и праведных предвещание: Радуйся, всесветлая Христова победо. Радуйся, державо и ограждение Царей благочестивых: Радуйся, украшение и венче иереев благоговейных. Радуйся, истины пресветлое удобрение: Радуйся, спасения благополучнейшее утверждение. Радуйся, светлое всех веселие: Радуйся, сынов Агарянских прогнание. Радуйся, нетленнаго света свещниче: Радуйся, души моея радование. Радуйся, Древо Треблаженное. Кондак 13. О, всепетое древо, носившее всех святых святейшее Слово, приемши наша поклонения, от всякаго избави злоключения всех, и вечныя изми муки тебе вопиющих: Аллилуиа. (Сей кондак чти трижды, посем кондак 1, икос 1) Молитва Животворящему Кресту Господню. Дивный чудодейственною силою, четвероконечный Крест Христов. У подножия Твоего в прах распростертый покланяюся Ти, Честное Древо, отгоняющее от нас всякое демонское стреляние и освобождающее нас от всяких бед, скорбей и напастей. Ты бо еси древо жизни. Ты бо еси очищение воздуха, освящение святаго храма, ограждение нашего жилища, охранение одра моего, просвещение ума моего, сердца и всех моих чувств. Твое святое знамение ограждает мя со дня моего крещения, оно со мною во вся дни живота моего и на суше и на водах оно же сопровождати мя будет до могилы, осенит прах мой, оно бо святое знамение чудодейственнаго Креста Господня возвестит всей вселенней о часе всеобщаго воскресения мертвых, и последняго страшнаго и праведнаго суда Божия. О Кресте Всечестный, осенением Твоим вразуми и научи и благослови мя недостойнаго, всегда несомненно верующаго в непобедимую силу Твою. Огради мя от всякаго врага и супостата, изцели вся недуги моя душевныя и телесныя. Господи Иисусе Христе Сыне Божий, силою Честнаго и Животворящаго Креста помилуй и спаси мя грешнаго. Аминь. Крест хранитель всея вселенныя. Крест красота церкве. Крест царей держава. Крест верных утверждение. Крест ангелов слава и демонов язва.
Ключевые Cлова: твоею, покрый, огради, непобедимое, благодатию, зовущия, Треблаженное, древо, Радуйся, оружие, поюедительное, вернии, покланяемся, Всечестный, Кресте, величаем, Радующеся, твоем, Возвышении, Божественном.
|